කේ.පී. වීරයා – අප කව්ද?

Photo by – dbsjeyaraj.com
පුරවැසි මාධ්‍යවේදියකුගේ සටහන් – සුනන්ද දේශප්‍රිය

මාධ්‍ය නිදහස ඇතුළු ශ්‍රී ලංකාවේ මානව හිමිකම් වෙනුවෙන් පෙනී සිටීම නිසා පසුගිය කාලය පුරා මෙරට සමාජ ක්‍රියාකාරීන්ට එරෙහිව නගන ලද අවලාද කොතරම් වී ද? එවැනි කී දෙනෙකු නම් පහර දීම් වලට ලක් වූයේ ද? පැහැරගෙන ගොස් අතුරුදහන් කරවන ලද්දේ ද? වෙඩි තබා ඝාතනය කරන ලද්දේ ද? තවමත් අවසන්ව නැති එම ක්‍රියාදාමය යටත් නැති ජනමාධ්‍ය නොනැවත බිය වද්දයි. අප සියළු දෙනාම වෙත එල්ල කරන ලද්දේ පට්ටා ගැසූ එකම එක චෝදනාවකි. එනම් මානව හිමිකම් වෙනුවෙන් පෙනී සිටින අප එල්ටීටීයේ සහ ප්‍රභාකරන්ගේ අනියම් සගයින් ය යන අභූත චෝදනාව යි.

රනිල් වික්‍රමසිංහ ආණ්ඩුව කාලයෙහි වත්මන් ආණ්ඩුවේ ප්‍රධානීන් එවකට අගමැති වූ වික්‍රමසිංහට ප්‍රසිද්ධියේ අභියෝග කළේ ප්‍රභාකරන් ත්‍රස්තවාදියකු ලෙස නම් කරන ලෙස ය. දේශපාලන සාකච්ජා මගින් ජනවාර්ගික යුද්ධය විසදීම කෙරෙහි බලාපොරොත්තු තැබූ වික්‍රමසිංහ ඒ අභියෝගයට බිය වූයේ නැත. එළෙස නම් නොකරන ලද වික්‍රමසිංහ ත්‍රස්තවාදයේ සහායකු ලෙස ලෙස හංවඩු ගැසුණි. ඒ එක නිදසුනක් පමණි.

එහෙත් දැන් බලව! අද ශ්‍රී ලංකාණ්ඩුවේ සගයකුව ආරක්ෂ ලේකම් රාජපක්ෂගේ කරවටා අත යවන තරමේ සිටින කුමරන් පත්මනාදන් කතා කරන රඟෟ. එල්ටීටීඊ ය සහ එහි නායක ප්‍රභාකරන් ගැන ඔහු ගෞරවයෙන් සහ ආදරයෙන් කතා කරන රඟ !.
“ප්‍රභාකරන්ගේ පුත්‍ර චාල්ස් ඇන්තනි සිය පවුල ගුවන් මගින් රටින් පිටට ගන්නා ලෙස මගෙන් ඉල්ලා සිටීමෙන් පසු පසු මා සැළැස්මක් සකස් කළා. මා යුක්රේනයෙන් පාචිච්චි කළ හෙලිකොප්ටරයක් මිලදී ගැනීමටත් කටයුතු යෙදුවා. නායකයා එකඟ නම් සැළැස්ම වූයේ චාල්ස් ඇන්ටනි හැර පවුලේ අය පිටරටකට ගෙන යන්න යි. නායකයා ඊට එකඟ නූනා නම් ඔහු, ඔහුගේ ආරක්ෂකයින් සහ ජේ්‍යෂ්ඨ නායකයින් හෙලිකොප්ටරයෙන් වන්නියේ කැලෑබඳ පෙදෙසකට ගෙන යෑමයි ඊළඟ සැළැස්ම වුනේ. අනතුරුව මදීවදිනි, ත්වාරිකා දුව සහ බාලචන්ද්‍රන් බාල පුතා නැවකට ගෙන ගොස් පොරොන්දු වි සිටි රටවල් තුනෙන් එකකට ගෙන යෑමට මා නැවෙහි සිටීමට එකඟ වුනා. ඒ රටවල් දෙකක් අප්‍රිකාවේ. එකක් ආසියාවේ.

“මේ මෙහෙයුම සඳහා මට ඩොලර් මිලියන 15ක් අවශ්‍ය වුණා. නමුත් එය ලැබුණේ නැහැ. ඒක කණගාටුවට කාරණයක්. අවශ්‍ය උදව් එල්ටීටීඊ ජාත්‍යන්තර ජාලයෙන් නොලැබුණාම මම හුඟක් කළබලයට පත් වුනා. මම කුලී ගුවන් නියමුවන් පවා සොයා ගත්තා. නමුත් මුදල් නැතිව මට කිසිවක් කර ගන්න බැරි වුණා. මැයි මාසයේ මැද භාගයේ දී ශ්‍රී ලංකා හමුදා තුන් පැත්තකින් පහර දීම පටන් ගත්තාට පස්සේ මහත් වේදනාවකින් මා සැළැස්ම අත හැරියා. අවශ්‍ය උදව් නොකිරීම ගැන මට දරුණූ තරහක් තිබුණා එල්ටීටීඊ ජාත්‍යන්තර ජාලයේ නායකයින් එක්ක.

“අන්තිමේ දී පවුලම මැරුණා. බාලචන්ද්‍රන්ගේ මරණය ගැන මා අතිශය දුක්වුණා. ඔහුට වසය 12යි. මා ඔහු දැක තිබුණේ නැහැ. නමුත් මා ප්‍රභාකරන්ට කතා කරන විට “ මෙන්න කේපී මාමාට කතාකරන්න යැයි ඔහු දුරකථනය සිය ඔඩෙක්කුවේ සිටි බාලචන්ද්‍රන්ට දීමට පුරුදුව සිටියා. ඉතින් මා ඒ විදියට බාලචන්ද්‍රන්ට ඒ දිනවල කතා කරනවා.

“යුද්ධය ඇවිල ගොස් ෂෙල් ප්‍රහාර උත්සන්න වූ විට දරුවා හුඟක් බය වී සිටියා. චාලස් ගුවන් මගින් බේරා ගැනීමේ සැළැස්මක් සකස් කරන ලෙස කී පසු ලාබාල බාලචන්ද්‍රන්ට කියා තිබුණා ඔහු ළගදීම කේපී මාමා ළඟට යවන බව. පුංචි හාදයා ඔහුගේ බඩු ටිකක් පුංචි බෑගයකට දමාගෙන හැම තැනම අරගෙන ගියාලු, ‛මම කේපී අංකල් ළඟට යනවා’ කිය කියා.

“බාලවන්ද්‍රන් පුංචි බෑගයත් අරගෙන ඇවිදිනවා මැවී පෙනෙන මට දුකකුත් මුදල් නොදීම ගැන වෛරයකුත් ඇති වෙනවා.

“ප්‍රභාකරන් පරාජය කළ යුද හමුදා පිරිස් ඔහු ගැනත් ඔහු මිය ගිය අන්දම ගැනත් ඉහලින් කතා කරනවා. ආරක්ෂ අංශයේ ඉහළම පුද්ගලයින් (මා කතා කරන්නේ කා ගැනද කියා ඔබට හිතා ගන්න පුළුවන්) මෙම කණ්ඩායම අවසානය දක්වා යටත් නොවී සටන් කළ ආකාරය තම සිත්හි අතිශය ලෙස කාවැදුණු බව මට කීවා. නමුත් සමහරු මරනයෙන් පසු ප්‍රභාකරන්ට අපහාස කරනවා. මට අවශ්‍යයි කියන්න මගේ නායකයා අවසානය දක්වාම සටන් කළ බව. ඔහු වීරයකුගේ මරණය උරුම කර ගත්තා.” (කුමරන් පත්මනාදන් කැනඩාවේ වාසය කරන ජනමාධ්‍යවේදී ඩී.බී.එස්, ජෙයරාජ් සමඟ කළ දීර්ඝ දුරකතන සාකච්ජාව, තුන්වන කොටස. සම්පූර්ණ සාකච්ජාව ඉංග්‍රිසි බසින් කියවීමට පිවිසෙන්න [http://www.dbsjeyaraj.com/]

ලියා දැක්වීම අනවශ්‍ය තරමටම කේපී ප්‍රභාකරන් සම්බන්ධයෙන් දක්වන ගෞරව සම්ප්‍රයුක්ත ආකල්පය මෙම දීර්ඝ සාකච්ජා පුරාම පෙනෙන්ට තිබේ.

ප්‍රභාකරන් වීරයෙක් ලෙස මිය ගිය බව අප කවරකු විසින් හෝ කීවේ නම් අමාත්‍ය කෙහෙළිය රඹුක්වැල්ලගෙන් අපට හොදවායින් දෙක තුනක් නොව බඩ යන්නම අසා ගන්නට තිබුණි. වාර්තාලාභී මරණිය උපවාසකරු වීරවංශ ගෙන් රූපවාහිනී වැඩ සටහන් දෙක තුනකින්ම අපේ මාපියන්ටත් එක්ක අසා ගන්නනට තිබුණි. සමහර විට ජනාධිපතිවරයා ම මාසික ජනමාධ්‍ය සැදෑවේ දී ‛අන්න සුනන්ද ප්‍රභාකරන් වීරයෙක් කරලා’ යැයි විහිළුවට වාගේ කියන්නටත් තිබුණි.

කුමරන් පත්මනාදන් නොහොත් කේ.පී.ට සමාව දී පුනරුත්ථාපනය කර ගැනීමට අප විරුද්ධ නොවිය යුතු ය. අප විරුද්ධ විය යුතු වන්නේ ඔහුට පමණක් විශේෂ සැළකීමක් කිරීම ගැන ය. දැන් කේ.පී.ට රාජ්‍ය නොවන සංවිධානයක් ද තිබේ. දෙමළ ඩසය්පොරාව සමඟ සාකච්ජා කරමින් ආණ්ඩුවාදී සමාජ ව්‍යාපාරයක් ගොඩ නැගීමට අවස්ථාව තිබේ. ලෝකයේ එහා කොනේ සිටින ජනමාධ්‍යවේදීන් සමඟ පැය ගනන් නිදහසේ කතා කිරීමට ද නිදහස් තිබේ. ඒ සියල්ලටම වඩා එල්ටීටීඊ ය සහ ප්‍රභාකරන් ගැන ගෞරවයෙන් ආදරයෙන් කතා කිරීමටත් නිදහස් තිබේ.

එසේ නමුත් සිරගත කර සිටින එල්ටීටීඊ සැකකරුවනට සිය දෙමාපියන් සමගවත් කතා කිරීමට නිදහසක් නැත. අත් අඩංගුවට ගැනීමෙන් පසු අතුරුදහන් වූ බව කියන අනෙක් එල්ටීටීඊ නායකයින් ගැන ආණ්ඩුවේ වගවීමක් නැත. යළි පදිංචිකරන ලද දෙමළ ජනයාට විවෘත සිර ගෙදරකට වඩා වැඩි නිදහසක් ලැබී නැත.
ආණ්ඩුවට කුමණ හෝ හේතුවක් නිසා කේ.පී. සිය තුරුලට ගැනීමට අවශ්‍ය වූයේ නම් ඒ සඳහා විවෘත සහ නීත්‍යනුකූල ක්‍රියා මාර්ගයක් අනුගමනය කිරීමට තිබුණි. ඊට උදාහරණයක් 71 කැරැල්ල සපයයි.

අපේ ජීවිතයේ ම කොටසක් වූ 1971 කැරැල්ලේ මුල් පෙළේ ප්‍රධානීන් දෙදෙනෙකු ම කේපී මෙන් රජයේ පැත්ත ගත්තේ ය. පසුව අප බොහෝ දෙනෙකුට සිර දඬුවම් දීමට අපේ එම නායකයින්ගේ සාක්ෂි ද උපයෝගි කර ගැනුණි. නමුත් එහි දී වෙනසක් තිබුණි. එම දෙදෙනා ම කැරැල්ල, ජවිපෙ සහ විජේවීර විරෝධී උග්‍ර ස්ථාවරයක් ගත්හ. කේ.පී. එල්ටීටීඊ යේ උරුමකරු වීමට උත්සාහ දරන මුත් ජවිපෙ උරුමකරුවන් ලෙස පෙනී සිටීමට ඔව්න් උත්සාහ ගත්තේ නැත. එමෙන්ම මහ නඩුවේ විත්තිකරුවන් ලෙස නම් කළ ඔව්න් ද නඩු විභාගය අවසන් වනතුරු ම රඳවා සිටියේ අප මෙන් ම වැලිකඩ සිර ගෙදර ය. කෑවේ කල්දේරම් බත් ය. නිදා ගත්තේ රෙට්ටුවේ ය. නැත්නම් බූරු ඇදේ ය. නෑවේ විසිල් එකට ය. අධිකරණය ඉදිරියේ චෝදනාවන්ට වරද පිළිගත් ඔව්නට සමාව ලැබුණේ නඩු විභාගය අවසානයේ දී ය. එම ක්‍රියාවලිය විවෘත සහ විනිවිද පෙනෙන සුළු විය. කේ.පී. සම්බන්ධයෙන් ද අනුගමනය කළ යුතුව තිබුනේ එවැනි පියවරකි.

අද කේ.පී.ට දේශපාලනයේ යෙදීමට අවසර තිබේ. මංත්‍රිවරුනට පවා නැති පහසුකම් යටතේ සරණාගත පිරිස් සංවිධානය කර ගැනීමට අවසර තිබේ. එල්ටීටීයේ නායකයකු ලෙස පෙනී සිටීමට අවසර තිබේ. රජ බොජුන් වළදමින් සැප ඇතිව ජිවත්වීමට අවසර තිබේ. කෙටියෙන් කේ.පී.ට නීතියක් නැත. ඒ එකම එක හේතුවක් උඩ ය. : එනම් වත්මන් පාලකයිනට දේශපාලන වශයෙන් සහාය දැක්වීමේ සහ අවනත වීමේ කොන්දේසිය යි. මන්ද යත් අද රටේ නීතිය යනු අවනත වීම නිසා ය. අදෝමැයි, වීරයකු වීමට නම් අද ශ්‍රී ලංකාවේ අවශ්‍ය කරන්නේ කීකරු වීමය.

ශ්‍රී ලංකාවේ නීතියේ පාලනය වෙනුවට ඇති වී තිබෙන පාලක දේශපාලකයිනගේ පාලනයේ දෙවන පුද්ගල නිදර්ශනය කුමරන් පත්මනාදන් ය. ප්‍රථම සහ ලොකුම නිදර්ශනය සරත් ෆොන්සේකා ය.

වීරවංශ තොවිලය සහ පණිවිඩය

පුරවැසි මාධ්‍යවේදියකුගේ සටහන් – සුනන්ද දේශප්‍රිය

තොවිලය අවසන් ය. අමාත්‍ය විමල් වීරවංශ මහතා පැය 60ක මරාගෙන මැරෙන
(උපවාස) ප්‍රහාරයකින් පසු රාත්‍රී භෝජනය පිණිස ගිලන් රථයකින් යුද හමුදා
රෝහලට සැපත් විය. මාරාගෙන මැරෙන උපවාසයෙන් සිදුවන්නට නියමිත
තමාගේ මරණයට වගකිව යුත්තේ කව්රුන්ද යන්න පවා ඔහු රූපවාහිනී
නාලිකාවන්ට දුන් අවසාන කැමැති පත්‍රයෙහි සදහන් කලේ ය. එය අපූරු
අවසාන කැමැති පත්‍රයකි. එහි සදහන් වුයේ “මාගේ මරණයට වගකිව යුත්තේ
ජනාධිපතිවරයා නොව එක්සත් ජාතීන්ගේ මහ ලේකම්වරයා ය” කියා ය. එහි
අපූරුව නම් එයට ජනාධිපතිවරයා ඈදා තිබීම යි. වීරවංශ මහතාගේ ස්වාධීන
තිරණයක් මත ආරම්භ කළ බව කී මෙම මරාගෙන මැරෙන උපවාසයට
ජනාධිපතිවරයා වග නොකිය යුතු බව ලොවට කීමට කීමට වීරවංශ මහතා
තීරණය කළේ ඇයි? එය ව්‍යංගයෙන් “ජනාධිපතිවරයා වගකිය යුතුයි නමුත් මා
වගකීම ගන්නවා ” යැයි කියනවා වැනි ය. කෙසේ වෙතත් අන්තිමේ දී
ජනාධිපතිවරයා වගකීම බාර ගත්තේ ය. ජනාධිපතිවරයාට වුව සිය උපවාසය
නතර කිරීමට ඉඩ නොදෙන බවට දෙතුන් පැයකට පෙර ප්‍රසිද්ධ කළ සිය උදාන
වාක්‍යය පසෙක ලා එතුමාණන් දුන් වතුර විදුරුව පානය කළ වීරවංශ මහතා සිය
මරාගෙන මැරෙන ප්‍රහාරය අවසන් කළෝ ය. බැං කී මූන්ගේ කමිටුව හෝ වීරවංශ
හෝ මිය ගියේ නැත.

වීරවංශගේ උද්ඝෝෂනය සහ ක්‍රියාව රාජපක්ෂවාදීන්ගේ පවා විවේචනයට ලක්
විය. ජිනීවා හි හිටපු ශ්‍රී ලංකා තානාපති දයාන් ජයතිලක කීවේ එ.ජා.
මහලේකම්ගේ විශේෂඥ කමිටුව ශ්‍රී ලංකාවේ සෛවරීභාවය කෙළෙසීමක් නොවන
බවත් මෙවැනි උද්ඝෝෂණ වලින් ශ්‍රී ලංකාවට සුගතියක් අත් නොවන බවත් ය.

ගලවා ගැනීමේ මෙහෙවරට ගිය ජනාධිපතිවරයා හැර ශ්‍රී ලංකා නිදහස් පක්ෂයේ
ප්‍රධානීහු වීරවංශට සෙත් පැතීමට ගියේ නැත. අමාත්‍යවරයකු සහ
ජනාධිපතිවරයාගේ ‛‛ලොකු පුතා” ලෙස හඳුන්වනු ලබන වීරවංශගේ කලහකාරී
උද්ඝෝෂනය විසින් අපහසුතාවයට පත් වූයේ බෑං කී මූන් නොව රාජපක්ෂ ය.
මෙම උද්ඝෝෂණය නිසා බැං කී මූන් ගේ ශ්‍රී ලංකාව සම්බන්ධ ස්ථාවරය නිවැරදි
යැයි කල්පනා කරන රටවල් ප්‍රමාණය වැඩි විය. එ.ජා. සංවිධානයට විරුද්ධ මෙම
කළහකාරී උද්ඝෝෂනය වාර්තා කළ සියලුම අන්තර් ජාතික ජනමාධ්‍ය වීරවංශගේ
සටන දුටුවේ සීමාව ඉක්මවූ ආණ්ඩුවේ අනුබලය ලබන දේශපාලන වාසි තකා
කැරෙන පටු ව්‍යාපෘතියක් ලෙස ය. රාජ්‍ය තාන්ත්‍රික ප්‍රශ්ණ මහ පාරේ විසඳීමට
ගිය වීරවංශ සටන එහෙම පිටින්ම පරාජය විය. පළමු පණිවිඩය එයයි.

වීරවංශ උපවාසය ශ්‍රී ලංකාවේ ජනයා රැවටීමට නැටූ තොවිලයක් බව දවස්
දෙකකින් පසු මරාගෙන මැරෙන සටන අවසන් වීම විසින් පෙන්නුම් කළේ ය.
උණ හැදුන මිනිස්සුත් ඔයිට වඩා දවස් නොකා ඉන්නා බව වීරවංශ ගැන හොදින්
දන්නා ජවිපෙ පා.ම. විජිත හේරත් කීවේ ය. එක් නාහෙට නාහන අන්තර් ජාල
දිනපොත්කරුවකු උපවාස ජායාරූපයක වීරවංශ ගේ හිස අසළ තිබූ ලෙමන් පප්
පැකට්ටුව රතු රවුමකින් වටකර ලෙමන් පප් මෑන් යයි නමක් දුන්නේ ය. තවක්
එවැනි නිර්මාණාත්මක බොලග්කරුවකු බැනරයේ අහොසි වචනයේ “අහෝ”
යන්න පමණක් පෙනෙනෙ සේ සෑදූ වීරවංශ උපවාස ජායාරූපයක් අන්තර්
ජාලයට එක් කළේ ය. විසංවාදී සිංහල වෙබ් දිනපොත්කරුවන් වීරවංශ උපවාසය
තලු මරමින් බයිට් කළහ. සන්ඩේ ලීඩර් කර්තෘ පෙඩරිකා ජෑන්ස් මරාගෙන
(නො)මැරෙන ප්‍රහාරයට පසු වීරවංශ හැදින්වුයේ මහා රුවටිලිකාරයා ලෙස ය. යුද
හමුදා පොලීසියේ මූලාශ්‍ර උපුටා දක්වමින් ලංකා නිවිස් වෙබ් අඩවිය කීයේ වීරවංශ
මාරක උපවාසය අතරතුර සුළු ආහාර ගෙන ඇති බව ය.

නොකා නොබී උපවාසයකින් ඉක්මනින් මිය යාමට නම් හොඳ ශරීර සෞඛ්‍යයෙන්
යුතු මානවයකු ජලය සහ ලුනු පානය නතර කළ යුතු ය. 1973 දී පමණ කොළඹ
මැගසින් බන්ධනාගාරයට පත්ව ආ නපුරු පාලකයකුට එරෙහිව විජේවීර ද
ඇතුලුව අප දෙදහසක් පමණ උපවාසයක යෙදුනෙමු. ඉතිරි වූ තිබූ පාන් කුඩු කර
තේ හැන්දක් පමණ දවසකට කමින් ලුනු මිශ්‍ර ජලය පානය කළ අපි බොහෝ
දෙනෙකු දවස් හයක් ම අසාධ්‍ය තත්ත්වයකට ලඟා නොවී දවසැරියෙමු. ජීවිත
පූජාව මගින් ඇමෙරිකානු අධිරාජ්‍යවාදී ආක්‍රමණයට විරෝධය දැක් වූ
වියට්නාමයේ ක්වාන් ඩක් හිමි කළේ සිය සිරුරට ගිනි තබා ගැනීම ය. ඉන්දීය
හමුදාවට එරෙහිව සිය ජීවිතය පූජා කළ යාපනයේ තීලීපන් කලේ දින 10කට පසු
උපවාසය තීරණාත්මක අවස්ථාවෙහි ජලය පානය කිරීම නතර කිරීම ය.
උපවාසයට දින11ක් පිරුණු 1987 සැප්තැම්බර් 26 දා ඔහු මිය ගියේ ය.

සීනි සහිත ලෙමන් පප් කමින් ජලය පානය කරන්නේ නම් දෙතුන් සතියකට වඩා
ලෙහෙසියෙන් ම මරාගෙන නොමැරෙන ප්‍රහාරයක යෙදිය හැකි ය. වීරවංශ මහතා
ඇත්ත වශයෙන්ම නම් යෙදුනේ මරාගෙන මැරෙන ප්‍රහාරයක නොවේ.
දේශපාලන ප්‍රහාරයක ය. මරාගෙන (නො)මැරෙන උපවාස කතාව වීරවංශ මහතා
හැඩකාර පෙනීම පිනිස හමීඩියා සාප්පුවෙන් මිලට ගන්නා වටිනා කමීස සහ හිස
ගල්වන ජෙල් මෙන් තවත් කැපී පෙනීමේ විෂුවල් එකක් පමණක් බවට පත් විය.
නමුත් එහි සංකේතාත්මක දේශපාලන අරුත ඊට වඩා දුර දිග යයි. දෙවන
පණිවිඩය එය යි.

ජනාධිපති රාජපක්ෂ සිය මරණයට වගකිය යුතු නැතැයි වීරවංශ මහතා කී නමුත්
ඔහුගේ උද්ඝෝෂනයට ආරක්ෂ ලේකම් ගෝඨාභය රාජපක්ෂගේ සහයෝගය
ලැබූණි. උද්ඝෝෂණකරුවන් පාලනය කිරීමට උත්සාහ කළ ඉහළ පොලිස්
නිලධාරීන්ට බැණ වැදී ඔවුන් එතැනට එවන ලද පොලිස්පතිවරයා ඉවත් කරන
බවට ආරක්ෂ ලේකම් කල තර්ජනය අඩංගු ලංකා ටෘත් වෙබ් අඩවිය ප්‍රසිද්ධ කළ
හඩ පටිය ව්‍යාජයකැයි ආණ්ඩුව කීවේ නැත. වක්‍ර ලෙස එම හඬ පටය පිළිගැනීම
මඟින් ආණ්ඩුව පොලීසියට දුන් සංකේතාත්මක පණිවිඩය ඉතා පැහැදිළි ය. එනම්
වීරවංශ යනාදීන් විසින් සංවිධානය කරන මේ අන්දමේ කිසිදු උද්ඝෝෂනයට
පොලීසිය විරුද්ධ නොවිය යුතු බව යි. නියෝජ්‍ය පොලිස් අධිකාරීවරයකුට පවා
ඇගිලි උලූක්කු කර තර්ජනය කිරීමේ බලයක් මේ වීරවංශවාදී උද්ඝෝෂකන්යිනට
තිබුණි. පොලීසිය නැට්ට හකුලාගෙන පසු බැස ගියේ ය.

එපමණක් නොවේ. කළක් ශ්‍රී ලංකාවේ නීතියේ පාලනය වෙනුවෙන් පෙනී සිටි
අධිකාරයක් වූ අමාත්‍ය නීති මහාචාර්‍ය ජී.එල්. පීරිස් කියා සිටියේ වීරවංශ
මහතාගේ උද්ඝෝෂනය ශ්‍රී ලංකාවේ ප්‍රජානත්ත්‍රවාදයට අනුකූල බැවින් එය
වැළැක්වීමට නීතියෙන් ඉඩක් නැති බව යි. අධි ආරක්ෂිත කලාපයක එක්සත්
ජාතීන්ගේ සංවිධානයේ ප්‍රධාන කාර්යාලය ඉදිරිපිට වේදිකාවක් ඉදි කිරීම සහ
එ.ජා. මහ ලේකම් විසින් ශ්‍රී ලංකාව සම්බන්ධයෙන් පත්කළ උපදේශක කමිටුව
ඉවත් කරගන්නා තුරු කිසිවකුට එ.ජා. කාර්‍යාලයෙන් පිට වීමට නොදෙන බව
කියා සිටීම සහ එම කාර්‍යාලය ඉදිරිපිට තොවිලයක් නැටවීම මහාචාර්‍ය පීරිස්ට
අනුව නීතියට අනුකූළ ය.

නිරායුධව පා ගමනේ යෙදෙනෙ සරසවි සිසුන්ට එළව එළවා පොලීසිය පහර
දෙන විට, සාමකාමී උපවාසයේ යෙදෙන භික්ෂුන් පොලීසිය පැමිණ බලයෙන්
පැහැරගෙන යන විට, ජෙනරල් සරත් පොන්සේකා නිදහස් කරන සේ ඉල්ලා
උද්ඝෝෂනයේ යෙදෙන පිරිස් වලට ඇමැති – මැරවර පිරිස් ලවා පහර දෙන විට
ජී.එල්. පීරිස් මහතාගේ ප්‍රජාතන්ත්‍රවාදී ක්‍රමය තිබුණේ නැති බව අපි හැම දනිමු.

තොවිලයක් නොවේ. රාජපක්ෂ පාලනයේ බලවතකුගේ කවර හෝ
දෙපාර්ථමේන්තුවක් ඉදිරිපිට දුම්මල පාරක් අල්ලා එක නැට්ටේ දෙහි ගෙඩි තුනක්
කැපීමටවත් ඉඩක් දෙනු ඇත් ද? වීරවංශ තොවිලයේ එක් පණිවිඩයක් එයයි. එනම්
ආණ්ඩුවේ බලවතුන්ට එක් රටේ ඕනෑම තැනක ඕනෑම තොවිලයක් නැටීමට ඉඩ
තිබෙන බව යි.

තොවිලයෙන් පටන් ගෙන නටපු නැටුමකුත් නැති බේරේ පලුවකුත් නැතිව මළ
ජූලියක් සේ කෙළවර වුණ වීරවංශ නාඩගම එක්සත් ජාතීන්ගේ සංවිධානයේ මහ
ලේකම් බිය වැද්දවීමට ලියූ තිර රචනයක් නොවේ. එය තනිකරම දේශීය
දේශපාලන වාසි තකා කරන ලද ඇන්දවීමකි. මන්ද යත් මෙවැනි නැටුමක් නටා
අන්තර් ජාතික රාජ්‍ය තාන්ත්‍රික ජයග්‍රහණයන් දිනා ගැනීමට නොහැකි නිසා ය.
එබැවින් දැන් දහ අට සන්නියට උපවාස සන්නිය නමින් හිනා කන අඩව්වක් එක්
කළ හැකි ය.

අවාඩා වේවා…

කෑදර ජාවාරමක මහා අපරාධය නොහොත් මෙක්සිකෝ බොක්ක තෙලින් වැනසීම

කෑදර ජාවාරමක මහා අපරාධය නොහොත් මෙක්සිකෝ බොක්ක තෙලින් වැනසීම

සුනන්ද දේශප්‍රිය

ෆරෑන්ක් ලෙන්ස්මයර්ගේ කුඩා ධිවර බෝට්ටුව බරතාරියා බොක්කෙහි අශෝබන ජරාවර්ණ තෙල් කැටිති අතරින් යාත්‍රා කරයි. හාත්පස පැතිර ඇති නිහඩතාවය සහ නිසළතාවය බියකරු ය.

සාමාන්‍යයෙන් වසරේ මේ කාලයෙහි මේ මුහුද ඉස්සන් හඹා යන ට්‍රවුට් සහ රතු මත්‍යසයින් ගෙන් නලියයි. ගොදුරු සොයා යන මුහුදු පක්ෂීන් සහ කරවැල් කොකුන් ද ජලය සිසාරා සොබාමත්ව මතුවන රංචු ගැසුණු මුහුදු ඌරන් ද ඒ දසුන වර්ණවත් කරයි.

නමුත් අද මේ මුහුදෙහි මසුන් මැරීම නතර වී තිබේ. විසිපස් වසරක් මෙහි ධිවර කර්මාන්තයේ යෙදුනු ලෙන්ස්මයර් ද සන්ඩේ ටෙලිග්‍රාප් පුවත්පතෙහි වාර්තාකරුවන් සමඟ සිය සුපරුදු මුහුදෙහි පසුගිය දිනෙක යාත්‍රා කරත් දී දක්නට ලැබුණේ ඇමෙරිකානු ඉතිහාසයේ දැවැන්තතම තෙල් පිටාරය සමඟ අසාර්ථක සටනක යෙදෙන බීපී සමාගමේ යාත්‍රා පමණි.

පසුගිය අප්‍රෙල් 20 දා ඇමෙරිකානු සමාගමක් වන බීපී ට අයත් ගැඹුරු මුහුදේ පිහිටි ඩීප් වොටර් හොරිසන් නම් තෙල් නිධියක පිපිරීමක් ඇති විය. මෙම තෙල් නිධිය පිහිටි තිබුණේ වෙරළෙහි සිට කිලෝමීටර 55කට දුරින් කිලෝමීටර් එකහමාරක් තරම් ගැඹුරු මුහුදු පත්ලේ සිට තවත් කිලෝ මීටර පහක් පමණ පොළව යට ය. සාගර පත්ලේ සිට කිලෝ මිටරයක් තරම් යටින් සිදුවූ, හේතුව තවම සොයා ගෙන නැති මෙම පිපිරීම සිදුවන අවස්ථාවෙහි සේවකයින් 126 දෙනෙකු එහි සේවය කරමින් සිටි අතර ඉන් 15 දෙනෙකුට තුවාල සිදු විය. තුවාල ලද 11 දෙනෙකු එහිදී ම ජීවිතක්ෂයට පත් විය. දින දෙකකට පසු ඩොලරි මිලියන 540 ක් වටිනා තෙල් නිශ්කාෂණ වේදිකාව සාගරයෙහි ගිලී ගියේ ය.

පුසුව අනාවරණය වූ අන්දමට මේසා ගැඹුරක තෙල් හෑරීමේ යෙදී සිටි බීපී සමාගම සතුව මෙවැනි තත්ත්වයකට මුහුණ දීමට අවශ්‍ය තාක්ෂනය හෝ දැනුම තිබුණේ නැත. පිපිරීම සිදුවූ පසු ඔව්නට කළ හැකිව තිබුණේ විවිධ අත්හදා බැලීම් මගින් තෙල් කාන්දුව නතර කිරීමට උත්සාහ කිරීම පමණි.

බීපී යනු බ්‍රිතාන්‍යයෙහි මූලස්ථානය පිහිටි අති දැවැන්ත සමාගමකි. තෙල් සමාගම් අතර තෙවැන්නා වන එය විශාලත්වය අතින් ලෝකයේ හතරවැනි සමාගම ය. 2001 දී සහ 2005 දී මදර් ජෝන්ස් නම් ඇමෙරිකානු සඟරාවක් විසින් ලොකයේ නරකම සමාගම් දහයෙන් එකක් ලෙස බීපී නම් කරන ලදී. පරිසර දූෂනය සහ මානව හිමිකම් කෙළෙසීම සම්බන්ධයෙන් එය යළි යළි චෝදනා ලබා තිබුණි. එමෙන්ම මෙම චෝදනාවන්ට වැරදිකරුවූ බීපී සමාගමට ඩොලර් මිලියන ගණනින් වන්දි සහ දඩ මුදල් ද ගෙවීමට සිදුවිය. ඩීප් වොටර් හොරිසන් පිපිරීමට පිළියමක් කර ගත නොහැකිව සිටින බීපී අද පෙන්වන්නේ ලාභ උපරිම කර ගැනීම මිස මහජන ආරක්ෂාව ගැන ප්‍රමාණවත් තැකීමක් එයට නොතිබුණ බව යි.

අනෙත් අතට ගැඹුරු මුහුදෙහි සවිකර තිබූ ඩීප් වෝටර් හොරිසන්හි තෙල් නල පුපුරා ගොස් තෙල් මුහුදු ජලය මතු පිටට කාන්දු වීමට ආරම්භ වූ අවස්ථාවේ සිට බීපී බහුජාතික සමාගම උත්සාහ කළේ මෙම දැවැන්ත අනතුර ලුහු කිරීමට ය. ප්‍රථමයෙන්ම එය කියා සිටියේ දිනකට තෙල් බැරල් 1000ක් පමණ මෙම පිපිරීම නිසා මුහුදු මතුපිටට එක් වෙමින් ඇති බව යි. නමුත් ඉන් දින පහකට පසු ස්වාධීන පරිසර සංවිධානයක් සිය පර්යේෂණ මගින් පෙන්වා දුන්නේ දිනකට තෙල් බැරල් පන් දහසක් ( ගැලුම් 210,000/ලීටර 795,000) මුහුදු මතුපිටට පිටාර ගලමින් ඇති බව යි.

නමුත් තව දුරටත් කළ පර්යේෂන මගින් එක්සත් ජනපද භූ-විද්‍යාත්මක වාර්තාවක් කියා සිටියේ දිනකට තෙල් බැරල් 12,000 සිට 19,000ක් තරම් මුහුදට එක්ව ඇති බව යි. මුහුද මතුපිටට පිටාර ගලනවාට වැඩි තෙල් ප්‍රමාණයක් මුහදු පත්ලට කාන්දු වන පෙන්වා දුන් තවත් විද්‍යාඥයින් කියා සිටියේ එහි ජලජ ජීවිත සහමුලින්ම වාගේ විනාශ වී ඇති බව යි. මෙවැනි තත්ත්වයකදී විශාල මත්‍යසයින්ට එම ප්‍රදේශය හැර යා හැකි නමුත් කුඩා මසුන් සහ වෙනත් ජීවීන් මරණයට පත් වෙයි. එමගින් ජලජ ජීවන චක්‍රය බිදවැටී මෙම කලාපයේ ධිවර කර්මාන්තනයට දීර්ඝ කාලීන විපත් ඇති කරන බව ද විද්‍යාඥයෝ පෙන්වා දෙති.

මෙම ගණනය කිරීම අනුව මේ වන විට මුහුදට එක්ව ඇති තෙල් ප්‍රමාණය බැරල් මිලියන 30ක් ඉක්වමා තිබේ. මේ වනාහී මෑත ඉතිහාසයේ දැවැන්තම තෙල් පිටාර ගැලීම බවට පත් වීමට ඉරණම් ලබා ඇති ඇදහිය නොහැකි තරමේ පාරිසරික සහ ආර්ථික විනාශයකි. දැනට ඇති තක්සේරු මගින් කියැවෙන්නේ අඩුම වශයෙන් එලඹෙන අගෝස්තු මාසය දක්වා තෙල් පිටාර ගැලීම වැලැක්වීමට නොහැකි වනු ඇති බව යි. තවත් වාර්තා කියන්නේ ලබන දෙසැම්බරය වන තුරුම මෙම තෙල් කාන්දුව පවතිනු ඇති බව යි. දෙමසකින් පමණ තෙල් කාන්දුව නවතිනු ඇත්තේ දැන් දැරෙමින් ඇති ප්‍රයත්නයක් වන ඒ අසළම වෙනත් තෙල් ලිදක් හෑරීම සාර්ථක වුවහොත් පමණි. ඒ ගැන කිසිවකුට සහතිකයක් නැත.

තෙල් කාන්දුව නතර කිරීමට ගත් කිසිදු ප්‍රයත්නයක් මෙතෙක් සාර්ථක වී නැත. ප්‍රථමයෙන්ම බීපී සමාගම තෙල් නල පිපිරුම වසා දැමීම පිනිස දැවැන්ත කොන්ක්‍රීට් ආවරණයක් පතිත කිරීමට උත්සාහ කළහ. එය උපන්ගෙයිම අසාර්ථක විය. අධික පීඩනයක් සහිත විදුම් උපකරණ භාවිත කරමින් පිපිරුම තුළට කැපූ ටයර් වැනි අපද්‍රව්‍ය පොම්ප කිරීමට දරණ ලද තැත ද සාර්ථක වූයේ නැත. අනතුරුව රෝබෝ සබ්මැරීන යවා නලයේ කැපුමක් ඇති කර ප්‍රභළ මූඩියක් සවි කිරීමට යෝජනාවක් මතු විය. එසේ නමුත් එම පියවර අසාර්ථක වුව හොත් වැඩි තෙල් ප්‍රමාණයක් පිටාර ගලනු ඇතැයි යන තර්කය මත එම යෝජනාව අත හැර දමන ලදී. මේ වනවිට බීපී සමාගම මෙම තෙල් කාන්දුව නතර කිරීමට සහ විපත් අවම කිරීමට ඩොලර් මිලියන 940 ක් වැය කර තිබේ. එහෙත් සාර්ථකත්වයක් නැත.

මෙම ව්‍යසනයේ පාරිසරික සහ ආර්ථික පාඩුව ඩොලර් ට්‍රිලියනයක් (1,000,0000,000,000) වනු ඇතියි තක්සේරු කරන විචාරකයේ එම මුදල බීපී සමාගම විසින් ගෙවිය යුතු බවට තර්ක කරති. ඒ සමඟම තවත් අයෙක් තර්ක කරන්නේ බරක් ඔබාමාගේ ජනාධිපතිවරණ අරමුදලට බීපී සමාගම විසින් කරන ලද පරිත්‍යාගයන් නිසා අවම වන්දියක් නියම කිරීමට ඔබාමා සූදානම් වන බව යි. තෙල් කාන්දුව පාලනය කළ බවට බීපී සමාගම කළ ප්‍රකාශ මහජනයා මුලා කිරිමට කරන ලද ප්‍රචාරක ගුන්ඩුවක් බව පෙන්වා දෙන මෙම පිරිස් දින 90ක් ගතවන විට මෙම කාන්දුව නතර නොකළ හොත් ජලජ ජීවී පද්ධතිය යළි පිලිසකර නොවෙන තරමට විනාශ වනු ඇති බව පෙන්වා දෙති. එය හුදෙක් මෙක්සිකෝ බොක්කට සීමා නොවනු ඇති අතර උතුරු අත්ලන්තික් සාගරයට සහ ඉන් එපිටට ද පැතිර යාමට ඉඩ තිබේ. තෙල් කාන්දුවට යටින් සාගර පත්ලෙහි සිදුව ඇති විනාශය පෙන්වන ජායාරූප මේ තාක් ප්‍රසිද්ධියට පත් කර නැත. තෙල් තට්ටුවෙහි සමස්ත පැතිර යාම පෙන්වන ප්‍රථම චන්ද්‍රිකා ජායාරූප නැෂනල් ජියෝග්‍රුපි සඟරාව විසින් පළ කරන තුරු ඇමෙරිකානු ආණ්ඩුව ඒවා ප්‍රසිද්ධියට පත් කළේ ද නැත. සාගරය මතු පිට ගලා යන තෙල් ඛන්ඩනය කිරීම පිණිස බීපී සමාගම යොදා ගන්නේ කුමන රසායන ද්‍රව්‍ය ද යන්න රහසක් වශයෙන් පවත්වා ගැනුනි. සමහර වාර්තා ප්‍රකාශ කරන්නේ ගිනි කන්දක ආකාරයෙන් මුහුදු පත්ලෙහි සිට සාගරයට තෙල් විදිමින් ඇති අතර එමගින් දැනටමත් එවරස්ට් කන්ද තරම් කුහරයක් සෑදී ඇති බව යි.

ලාභය පමණක්ම මුල් කැරගෙන කැරෙන මහා පාරිමාණ ජාවාරම් විසින් මහ ජනයාගේ සුභ සිද්ධිය සහ පාරිසරික සමතුලිතබව රැක ගැනීම අවශ්‍ය කර්ණක් ලෙස සළකන්නේ නැත. ඉන්දියාවේ බෝපාල් ඛේදවාචකය තවමත් විපාක ගෙන දෙන එවැනි මහා කාර්මික ව්‍යසනයකි. තවත් එවැනි ව්‍යසනයක් වූ ෂෙල් ගෑස් සමාගම නයිජීරියාවෙහි ඔගොනි ජනයාගේ භූමියෙහි කරන ලද අක්‍රමවත් සහ අපරීක්ෂාකාරී තෙල් නිශ්කාශන ක්‍රියාවාලිය එම ජනයාට මහත් විපත් ගෙන ආවේ ය. එම සාහසික කාර්මික තස්ත්‍රවාදයට එරෙහිව සටන් කළ ජනයාගේ නායකයකු වූත් සුප්‍රසිද්ධ ලේඛකයකු වූත් කෙන්සාරෝ විවා සමාගමේ බලපෑම් මත 1995 දී එල්ලා මරා දමන ලදී. මෙවැනි බහු ජාතික සමාගම් ඇමෙරිකාවේ දී වුවත් අප්‍රිකාවේදී වුවත් ආසියාවේ දී වුවත් රාජ්‍යයන්හි රැකවරණය ලබති.

එසේ නමුත් බීපී සමාගමේ බොරු ප්‍රචාර යටපත් කරමින් විපතෙහි ඇත්ත තත්ත්වය එරටෙහි හෙළිදරව්වත්ම ඇමෙරිකානු ආණ්ඩුවට නිහඩව සිටිය නොහැකි විය. එම තත්ත්වය ඇති වූයේ සමාගමට සහ ආණ්ඩුවට ගැති නොවූ ජනමාධ්‍ය සහ සිවිල් සමාජ සංවිධාන විසින් කරන ලද ගවේශනාත්මක වාර්තාකරණයන් ය. විශ්ව විද්‍යාල දෙකක ඉංජිනේරු විද්‍යාඥයින් කියා සිටියේ සිය පරීක්ෂණ අනුව දිනකට තෙල් බැරල් 100,000 පමණ සාගරයට මුදා හැරෙමින් ඇති බව යි. එය සමාගමේ මුල් පකාශය වු බැරල් 1000 මෙන් සිය ගුණයක වැඩි වීමකි. මෙම ව්‍යසනය පිලිබඳව අදහස් දැක් වූ ඇමෙරිකානු ජාතික වන සත්ව සංගමයේ ප්‍රධානියා කියා සිටියේ පිපුරුම අපරාධයක් සේ සැළකිය යුතු බවයි. වර්ධනය වෙමින් ආ මෙම තත්ත්වය යටතේ සමාගමට එල්ල වන මහජන විරෝධය තමන් කෙරෙහි එල්ල වීම වළක්වාගනු පිණිස ඔබාමා පාලනයට ඍජු පියවර ප්‍රකාශයට පත් කිරීමට සිදු විය. එරට අභ්‍යන්තර ලේකම් කෙන් සල්ෂා කියා සිටියේ බීපී සමාගම කියන කතා මගින් තමන් තීරණයන්ට නොඑළෙඹෙන බව යි. සමාගම අවසානයේ දී බීපී සමාගමේ ප්‍රධානියා ක්‍රොන්ග්‍රසය හමුවට කැදවනු ලදුව උග්‍ර ප්‍රශ්ණ කිරීමකට ලක් විය. එය සජීවීව දැක ගැනීමට ඇමෙරිකානු ජනයාට අවස්ථාව ලැබුණි.

තෙල් කාන්දුව අවමයක් ලෙස දැක්වීම පිළිබඳ සමාගමේ බොරු ප්‍රචාරයන්හි අරමුණ වුයේ ගෙවීමට සිදුවන වන්දි දැවැන්ත ලෙස අඩු කර ගැනීම සහ මහජන අපවාදයෙන් බේරීම ය. සිය අපරීක්ෂාකාරිත්වය නිසා සිදුවූ මෙම මහා ආර්ථික සහ පාරිසරික විනාශය ගැන බීපී සමාගමට කිසිදු කැක්කුමක් තිබුණේ නැත.

එනමුත් දැන් මෙම පාරිසරික ව්‍යසනය විසින් බීපී සමාගම මත ගෙන එනු ඇති මහත් ආර්ථික අවාසි ඉහළ යමින් තිබේ. සමාගමේ කොටස් මිල පහත වැටී ඇති අතර 2010 මැයි මාසයෙන් පසු කාලය සඳහා බීපී සමාගම සමඟ වෙළද ගනුදෙනු සඳහා ගිවිසුම් ඇති කර ගැනීමෙන් වළකින ලෙස බැංකු උපදෙස් ප්‍රකාශයට පත් කර තිබේ. බීපී සමාගම ඇද වැටෙනු ඇත්දැයි අද අන්තර් ජාතික ව්‍යාපාර ක්ෂේත්‍රයේ සකච්ජාවට ලක් වෙමින් තිබේ.

ලාභ උපරිම කරගත හැකි නම් ප්‍රාග්ධන විසින් මිනී මැරිමට වුව නෙපෙසුබට වන බව කාල් මාක්ස් කීවේ වසර 150කට තරම් පෙර ය. දැන් බීපී සමාගමේ මෙම දුෂ්ට හැසිරීම විසින් පෙන්නුම් කරන්නේ එම ප්‍රකාශයේ සත්‍යතාවය යි. ලාභ ලැබීම පමණක් අරමුණු කර ගත් සංවර්ධනයක් නොව චිරස්තායී සංවර්ධන මාදිලියක් ලෝකයට අවශ්‍ය බව මෙවැනි ව්‍යසන අපට යළි යළි සිහිපත් කර දෙයි.

මැතිවරණයේ පළමු මිනිස් ඝාතනය මාවතගමින්

ජොනී සහ ඉන්දික වෙනුවට ලැයිස්තුවේ අනෙක් දෙදෙනා නම් කරන ලෙසට මැ.කෝ දන්වයි

ගුවන්විදුලි,ලේකහවුස් හා රූපවාහිනි සේවකයන් අනුර යාපාගේ ඡන්ද වැඩට

කුරුණෑගල එකම අංකය යෙදු වාහන මැතිවරණ වැඩට

නිවසට පහරදුන් මැරයන් සංවිධායකගේ පෙළපාලියේ

Next Page »