Image Credit: lankaviews
කාටදැයි කියන්නේ
යළි එපා කිය කිය
කියන්නේ කාටද
ඒක මළ ජූලිය
|
සහෝදර හිත් ඇති සිංහල
මිනිස්කම් බෙදාගත් ජාතිය
අත වනා කට පුරා
කෑ ගසා කියන්නේ කාටද
|
හිටු කියනකො හිටින
නට කියනකොට නටන
මිහිහෙකුගෙ හදවතට කොකා ගස්සන
කැති පොරෝ මන්න ගෙන
ජාතීයට පන පොවන
මිනිසතුන්ටද කියන්නේ
|
සිංහල බෞද්ධ වියගසෙහි බැඳ ඇති
ඇස් නැති
කන් නැති
හිත් නැති
ඒ අපූරු පූර්වජයාටද
ආණ්ඩුවටද රජයට ද
එහිම නිදන් වූ
මර්ධන මෙවලමටද
කියන්නේ කෑ ගසා
යළි එපා යළි එපා කිය කියමින්
|
මුනින් හැරවූ කළයකි
මර්ධනය හිංසනය
තර්ජනය ඝාතනය
නීතිගත කොළඹ ආණ්ඩුව
උන්නැහේලටදැයි කියන්නේ
ජූලියක් තව එපා
|
එහෙම නැතිනම්
බැට කෑව උන්ටමද
අපි මේ කියන්නේ
ජූලියක් යළි එපා
|
ආදරයක් ඇති හිත්
අතලොස්සක්
දුක වේදනාවේ කොටසක්
බෙදා ගන්නට
හරි හමන් බසක් නැති
අවිශ්වාසයම දළු ලන
සතර දිග ලංකා දීපයම
මේ පිටුවහල් ලෝකයම
ජූලියක් එපා යැයි
කාට කියන්න ද
|
අපි අපිට කියන්නෙමු
හදවතේ පුංචි සතුටක
කළ යුතු එකම දෙය වත්
අවසාන අරගලය නොවුවත්
කවුළුවක් ඇරගන්න
අතීතේ දොර වහගන්න
ලෝකයේ ලස්සන දකින්නට
පුංචිම පුංචි පණිවිඩයක
මිනිස්කම ලියන්නට
|
යලි එපා කියමින් අපිටම කියා ගත්තත්
අපි නොවන ඔවුන්ටයි
මේ කියන්නේ ජූලියේ මතකය
|
උදය ආර්. තෙන්නකෝන්
