ජීවතුන් අතර ඇති කටහඬක් එක්කන්
හීනෙකින් අත වනන හදවතකි රත්‍රං
හීතලෙන් හිරි නොවැටි සිරියාව තවරන්
මාතලන් අදත් එයි ආදරය ඉල්ලන්
කලබලය ඇස් වලින් බෝ දුරක් උස්සන්
අරගලය මේ මෙතැන කියාගෙන ගස්සන්
හිටි හැටියෙ නිහඬ මුව ඇහැරන්න හැකි නම්
පෙස්සමක් ගහන්නට වැඩි තරම් අස්සන්
ලෙනින් සහ ලෙයින් පිදු පරපුරක දුර තතූ
අද වගේ කියන්නට සමත්කම් පෑ නෙතූ
මෝටර් සයිකලය ගෙන සවාරිය නොම ගෙතූ
අවසාන මිනිත්තුවෙ වැය කළෙත් ලේ රතූ
“කොම්රේඩ් වැඩ මොකද කැටේකට සෙට් වුණා
මේ පැත්තෙ වරෙන් බං නිදහසේ ” කට් වුණා
එදා අන්තිම දවස – මට උඹව මිස් වුණා
නිපොන් හෝටලය ළඟ අදත් මං ගැස්සුණා
නික්ම ගිය පසු සුළඟ මහා වැසි විසිරුණා
සෙරෙප්පුවෙ පටි කැඩී දෙපා තුඩු ඉස්සුණා
කවිතා ද රුවිතා ද මොකක්දෝ මතු වුණා
පුස් ඩෝං වගේ බං එකම තැන කුඩු වුණා
සංවාද කෝටියක් ගල් ගැසී හොල්මන්
සංතාප මතු වෙවී හිත් ගැඹුර අල්ලන්
මං තාම යුක්තියක් සොයනවා රිද්දන්
මාතලන් හෙටත් එයි ආදරය ඉල්ලන්.
කසුන් මහේන්ද්‍ර හීනටිගල | Kasun Mahendra Heenatigala
